Usapang HH
May 26, 2009Sa dinami-dami na ng napasukang relationship mo, at sa bawat break-up na nagaganap, hinding-hindi mawawala ang mga banat na HH. Huling Hirit.
Dahil ang isang break-up ay hindi kadalasang gusto ng parehong magsyota. Karaniwan itong hinihingi ng isa sa mags-syota dahil sa mga dahilang siya lang ang nakakaalam na siyempre, ipapaliwanag niya sa syota niyang balak niyang iwan para naman maging fair, o kung masyadong maselan ang dahilan niya, maari siyang magsinungaling at sabihing strict nga pala ang parents niya at kailangan niyang magfocus sa pag-aaral. Pero kasinungalingan ang lahat ng iyan dahil ang tunay na pag-ibig, walang sinasanto kahit nanay o tatay mo pa at walang grades na iniintindi, puro nag-uumapaw na pagmamahalan lang.
Ngayon, ano nga ba ang HH, Huling Hirit? Ito ay isang soliloquy na binibigkas ng taong iiwan para masave ang relationship na ayaw niya pang iwan kasi nga, masaya naman siya, pero yung partner niya hindi na. Kapag nasa isang relationship ka kasi, ang hirap i-apply nung kasabihang, “If you love him/her, you’ll set him/her free.” kasi sa movies lang yun nagagawa kahit alam mong sa ending, magkakabalikan din naman sila. At para sakaling mapagbago ang isip ng jowa mo, magbibitiw ka ng HH, Huling Hirit.
Ngayon, maraming klase ng HH, at kadalasan, ito lang naman ang laman o structure nila depende sa dahilang binigay sa iyo.
HH no. 1 Magbabago na ako
Jowa 1: Itigil na natin to. Nagkamali ako, hindi ko inakalang magiging ganyan ka pala.
Jowa 2: (HH SPEECH) Sorry labidabs. Aaminin ko, nagpabaya ako. Hindi ko sinasadyang maging sobrang lasinggero at hindi ko kasalanan kung napeerpressure ako nung barkada na magsimulang magyosi. Hindi ko alam kung ano ang naging problema ko. Dapat naman masaya ako kasi alam kong nariyan ka’t nagmamahal sa akin. Pangako, MAGBABAGO NA AKO, huwag mo lang sana akong iwan dahil kailangan kita.
HH no. 2 Ako ang mas nagmamahal sa iyo
Jowa 1: Itigil na natin to. Hindi na kita mahal, si Frank na ang gusto ko.
Jowa 2: Bakit? Sapat na bang dahilang iwan mo ako dahil si Frank, kayang bilhan ka ng load kapag naubusan ka na at ako, hanggang pasaload 2 pesos lang? Sapat na bang dahilan na si Frank ka sumama dahil siya yung itinutukso sa ayo ng mga kaibigan mo kapag wala ako? Sapat na bang dahilan na porket sinabi niya sa yong gusto ka niya kahit isang linggo pa lang kayong nagkakakilala kaya iiwan mo na ako? Drama lang ni Frank yan, hindi yan magtatagal sa yo dahil chickboy yan. Ako ang mas nagmamahal sa iyo. Ayokong masaktan ka sa piling ng iba, kaya dito ka na lang sa akin, ang tunay na nagmamahal sa iyo.
HH no. 3 Hindi ko siya mahal, ikaw ang mahal ko
Jowa 1: Ayoko na. Hindi mo na ako iginagalang. Buong pag-aakala ko, solid ang love team natin, pero may iba ka na pala.
Jowa 2: Huwag ka namang magselos at magduda aking crispy tuna flakes. Kailanman ay kaibigan lang ang naging turing ko sa kaniya, at ganun din naman siya sa akin. Wala akong balak ligawan siya dahil wala akong nakikitang dahilan yun. May itsura siya oo at may kotse din, pero, hindi yun ang kailangan ko. Ikaw ang kailangan ko. Hindi ko siya mahal, ikaw ang mahal ko. Kaya’t huwag ka sanang makipagbreak sa atin. Di ba, Together forever tayo?
HH no. 4 Maghihintay ako, kahit buong buhay ko
Jowa 1: Tama na. Wala ka nang aasahan sa akin.
Jowa 2: Hindi ko kailangan ng iyong mga dahilan. Ikaw ang kailangan ko. Ang puso mo. Ang isipan mo. Ang kaluluwa mo. Ang pagmamahal mo. At iyon din naman ang kaya kong ibigay sa iyo. At sa iyo ko lang iyon balak ibigay dahil ikaw ang mahal ko. Kung kailangan mo ng oras, edi sige, pagbibigyan kita. Pero, Maghihintay ako, kahit buong buhay ko, magbalik ka lang.
HH no. 5 Sige, iwan mo ako, wala nang magmamahal sa iyong iba (P. Dela Cruz 2009)
Jowa 1: Sinaktan mo ang damdamin ko. Ayoko na. Tama na.
Jowa 2: Hindi ba ako taong vulnerable sa pagkakamali? Sorry naman a. Tao lang ako. Tao lang akong nagmamahal. Hindi ako perpekto, pero totoo akong magmahal. At kung iniisip mo na sa piling ng iba ay hindi ka magkakaroon ng mga ganitong problema, tanga ka. Dahil ang lahat ng relationship, may problema. Sige, iwan mo ako, wala nang magmamahal sa iyong iba dahil nakuha ko na ang pinag-iingatan mong puri. Wala ka na. Basura ka na lang. Kaya kung ako sa yo, tayong dalawa na lang.
Hindi limitado sa mga iyan ang mga HH na maaaring bitiwan. In general, ang layunin ng HH ay ang maconvince ang mang-iiiwan na maghunos-dili at marealize niya na mali ang gusto niyang mangyari. Dahil sa pag-ibig, mahirap maiwan ng taong mahal mo pa rin. At kung talikuran ka man niya, lalakarin mo pa ang buong mundo para magkasalubungan kayo ulit. MAhirap yata maglakad sa buong mundo. Kung kaya’t, pag-isipan ng mabuti ang HH na sasabihin mo dahil one time big time ka lang pwedeng magbitiw ng HH speech. Dalawa max. Kapag araw-araw mo na kasing kinukulit yung nang-iwan sa yo, tanga ka na nun. Magmove on ka nga.
