Monster Guide to Moving On
February 7, 2009Uso ang maging single nowadays. Kapag hindi ka single, hindi ka cool. At dahil sunod sa uso ang boypren/gerlpren mo, magdedesisyon siya makipagbreak sa yo, tulad nung nauso yung skinny jeans, bumili siya ng pito, iba-ibang kulay pa.
Well don’t fret, dahil ito na ang step-by-step guide para makamove on ka’t hindi na isipin siyang muli kailan man.
1. Magsimula ka ng bisyo.
-Increase your nicotine and alcohol intake. Oo, miserable ihawin ang baga mo at lunurin ang atay mo, pero, hindi yun kasing miserable ng kung paano dinurog yung puso mo. Hindi ganun kadali magpa-heart transplant. Nakakatulong din na magbisyo with your friends. Uminom kayo together. Magyosi kayo together. Makakatulong to kasi madidistract ka tapos nakakabond mo pa ulit yung mga kaibigan mong minsan mong iniwan kasi single sila tas ikaw taken, pero magkasama na ulit kayo ngayon kasi nga wala kang mapupuntahang gerlpren/boypren. At hindi ka pwedeng saktan ng mga kaibigan mo.
2. Maligo ka parati.
- Kailangan matanggal ang iniwang marka sa yo nung taong minahal mo ngunit sinaktan ka. Enough ba ang sampung paligo para matanggal ang alaala ng kanyang mga haplos sa yo? HINDI. Kaya dapat, magsabon ka ng sobra hanggang mapudpod na yung sabo mo. At sabi rin kasi to ng lolo ko, “Init lang yan! Maligo ka ng malamig!”
3. Bumili ka ng supot…
-At ipasok ang lahat ng bagay na maaaring magpaalala sa iyo nung nang-iwan sa yo. Itabi ang supot sa isang madilim na sulok tulad na lang nang lugar na lagi mong tinatambayan pag nagmumukmok ka sa kalungkutan. Kapag ready ka na, pwede mo itong itapon. Kung gusto mo ng drama, pumunta ka sa bahay ng ex mo, at ibalik mo sa kanya.
4. Sumali ka sa gym
-Para the next time na magkasalubungan kayo nung ex mo, makikita niya ang katawang di na niya matitikmang muli, kasi ngayon, mas macho ka na o mas sexy ka na. Magsisisi siya bigla na pinakawalan ka niya para sa ibang lalake/babae na may excessive love handles o di kaya’y mukhang kahawig ng siko ng matabang egoy. Hot ka na ngayon. Siya hindi. Haba ng hair mo.
5. Mag-artista ka
-Para magsisi ulit siyang pinakawalan ka niya. Pag nasa The Buzz ka at tinanong kung ilan na ang naging ex mo, sabihin mo, “Wala.” O kaya wag mo siyang banggitin. Para magmukhang wala lang yung inyong nakaraan. Sampal yun sa mukha niya. O diba. Showbiz na showbiz.
6. I-increase ang Landi Tendencies
-Kung dati, introvert ka, dapat, ngayong sawi ka, taasan mo ang panglalandi mo. Okay yun kasi it brings you back to the game. At okay rin yung opener, ikaw yung bitter, vulnerable person na nangangailangan ng magcocomfort. Hindi yun attractive, pero, okay siyang pangkuha ng atensyon. Pag sawa ka na sa ganung routine, maging malandi ka lang. Period. Dadami ang friends mo at malay mo, mahanap mo ang next potential lover mo sa panlalandi.
7. Magbisyo ka
-Kailangan talaga to. Kaya mahalagang inulit ko.
8. Bumili ka ng alagang Pagong
- Hindi ka iiwan niyan. Kasi nga, alaga mo siya. Pwede mong ibuhos lahat ng pagmamahal mo sa pagong na ito, at hindi siya magrereklamo. Subukan man niyang tumakas, di niya magagawa kasi pagong siya at mahahabol at mahahabol mo rin siya.
9. Magbukas ka ng blog
- Okay magblog. Pwede mong isulat lahat ng feelings mo about sa nangyari that way, may outlet ka ng negative emotions na dapat nang matanggal sa loob ng sistema mo. Pag may nakilala kang cutie, blog about it tapos make sure na mababasa to ng ex mo para makita niyang nakamove on ka na at libag na lang ng pwet ng kabayo ang tingin mo sa kanya.
10. Bumili ka at manood ng Horror Movies
- Kailangan mo na kasing masanay na wala kang kayakap o walang yayakap sa yo kapag nanonood ng horror movies. Kapag nasanay ka na, madali nang manood ulit ng chick flicks o kaya yung susunod na movie ni Richard Guttierez at KC Concepcion.
Sana makatulong ang listahang ito. Magmahal at masaktan ay parang kape at pandesal, hindi maipaghihiwalay. Humayo kayo at magmove on.
